Shayri ( My Collection) - Page 90

Kabhi Khud Pe Kabhi Halaat Pe Rona Aya
Bat Nikli To Har Ek Bat Pe Rona Aya...!!!

Tha Magar Aisa Akela Tha Main Kahan Pehlay
Meri Tanhayi Mukammal Teray Anay Se Hui...!!!

Dil Roz Sajata Hoon Main Dulhan Ki Tarha Se
Gham Roz Chalay Atay Hain Baraat Ki Manind...!!!

Dil Main Rakhay Hain Hamnay Baday Ehtram Se
Diye Hain Gham Jo Tumnay Mohabbat Ke Naam Se...!!!

Apsay Milkay Hum Kuch Baday Se Gaye
Shair Padhnay Lagay Gungunanay Lagay
Pehlay Mashhoor Thi Apni Sanjeedgi
Ab To Jab Dekhiye Muskuranay Lagay...!!!

Kya Kartay Ke Iqrar Ki Soorat Bhi Nahi Thi
Hum Kartay Jo Inkar Ye Jurrat Bhi Nahi Thi
Roya Tha Bahut Dair Tak Us Se Bicchad Kar
Mujhko To Magar Us Se Mohabbat Bhi Nahi Thi
Hum Jeetay Bhi Akhir To Kis Ummeed Pe Jeetay
Paas Apnay To Kuch Dard Ki Daulat Bhi Nahi Thi
Sach Keh Doon Ke Mujhko Bhi Thi Kab Uski Zaroorat
Duniya Ko Agar Meri Zaroorat Bhi Nahi Thi
Kya Haal Hai Us Sahib-E-Dastaar Se Poocho
Apni To Yahan Par Koi Izzat Bhi Nahi Thi
Ye Ahl-E-Khirad Chaak Gireban Se Kyun Hain
Kuch Itni Junoon Khaiz Ye Wehshat Bhi Nahi Thi...!!!

Wo Jidhar Thay Udhar Gaye Hongay
Hum Na Janay Kidhar Gaye Hongay
Ab Wahan Shaam Ho Gayi Hogi
Log Ab Apnay Ghar Gaye Hongay
Kuch To Unki Khata Rahi Hogi
Hum Bhi Had Se Guzar Gaye Hongay
Khwab Apnay Bhi Phool Jaisay Thay
Toot Kar Sab Bikhar Gaye Hongay
Sirf Jeenay Ki Ek Tamanna Main
Hum Kayi Bar Mar Gaye Hongay
Muddaton Bad Khud Ko Dekha Tha
Itni Wehshat Thi Dar Gaye Hongay...!!!

Main Kahan Tak Tujhay Safayi Doon
Khud Ko Ilzam-E-Bewafayi Doon
Tujhsay Main Dushmani Shadeed Karoon
Pyar Bhi Tujhko Intehayi Doon
Aey Meri Jaan Gar Ijazat Ho
Zakhm Ko Izn-E-Lab Kushayi Doon
Zindagi Tujhko Aitbaar Nahi
Apnay Honay Ki Main Gawahi Doon
Mujh Ko Khud Meray Paas Le Ana
Main Tujhay Gar Kaheen Dikhayi Doon
Ek Zamana Hai Gosh Bar Aawaz
Ek Zamanay Ko Main Sunayi Doon
Wa Karoon Tujh Pe Manzil-E-Idraak
Phir Tujhay Zauq-E-Na Rasayi Doon...!!!

Yaqeen Kehtay Hain Jisko Us Main Ek Imkaan Rehta Hai
Main Patthar Hoon To Is Patthar Main Bhi Insaan Rehta Hai
Mujhay Dar Hai Agar Milna Zara Ek Fasla Rakhna
Main Sunta Hoon Meray Andar Koi Haiwaan Rehta Hai
Hasad, Nafrat, Mohabbat, Aarzoo, Khwahish, Adawat Bhi
Meray Andar Zaroorat Ka Har Ek Samaan Rehta Hai
Uthata Hoon Main Ek Shai Doosri Shai Toot Jati Hai
Meray Har Fayeday Main Bhi Koi Nuqsaan Rehta Hai
Tumharay Shehr Ki Buniyaad Main Aasaib Hai Koi
Yahan Jo Shakhs Rehta Hai Bahut Hairaan Rehta Hai
Tunhari Chahaton Ki Roz Ek Taaza Kahani Hai
Hamaray Ishq Ka Bhi Ek Naya Unwan Rehta Hai...!!!