Shayri ( My Collection) - Page 38

Yunhi Be-Sabab Na Phira Karo
Koi Sham Ghar Bhi Raha Karo
Wo Ghazal Ki Sacchi Kitaab Hai
Usay Chupkay Chupkay Parha Karo
Mujhay Ishtehaar Si Lagti Hain
Ye Mohabbaton Ki Kahaniyaan
Jo Kaha Nahi Wo Suna Karo
Jo Suna Nahi Wo Kaha Karo
Abhi Raah Main Kayi Mod Hain
Koi Ayega, Koi Jayega
Tumhay Jisnay Dil Se Bhula Diya
Usay Bhoolnay Ki Dua Karo
Koi Haath Bhi Na Milayega
Jo Galay Milogay Tapaak Se
Ye Naye Mijaaz Ka Shehr Hai
Zara Faaslon Se Mila Karo
Ye Khiza Ki Zard Si Shaal Main
Jo Udaas Ped Ke Paas Hai
Ye Tumharay Ghar Ki Bahaar Hai
Isay Ansuon Se Hara Karo...!!!

Dil Jalanay Ki Baat Kartay Ho
Aashiyanay Ki Baat Kartay Ho
Humko Apni Khabar Nahi Yaaro
Tum Zamanay Ki Baat Kartay Ho
Sari Duniya Ke Ranj-O-Gham Dekar
Muskuranay Ki Baat Kartay Ho
Zikr Mera Suna To Chir Ke Kaha
Kis Deewanay Ki Baat Kartay Ho
Haadsa Tha Guzar Gaya Hoga
Kis Ke Janay Ki Baat Kartay Ho...!!!

Dhoonda Jo Zindagi Ka Sitara Kabhi Kabhi
Ghabra Ke Phir Unhi Ko Pukara Kabhi Kabhi
Kuch Dard-E-Ishq Se Hamein Haasil To Ho Gaya
Kartay Hain Wo Bhi Zikr Hamara Kabhi Kabhi
Hum Dil Main Dekh Letay Hain Tasveer Apki
Hota Hai Yun Bhi Jashn-E-Nazara Kabhi Kabhi
Sab Mukhtasir Hui Shab-E-Gham Ki Musibatein
Dil Se Liya Jo Naam Tumhara Kabhi Kabhi
Wo Waqt Bhi Qareeb Hai Jab Meri Yaad Ka
Lena Parega Tum Ko Sahara Kabhi Kabhi
Main Kya Karoon Ke Tark-E-Talluq Ke Bawajood
Aa Jata Hai Khayal Tumhara Kabhi Kabhi
Dard Apna Gham Ki Kaali Ghatao Main Chup Gaya
Chamka Agar Naseeb Ka Taara Kabhi Kabhi...!!!

Jisay Samjhtay Thay Hum Apni Zindagi Ki Tarha
Wo Aashna Bhi Mila Hamsay Ajnabi Ki Tarha
Bahut Hi Toot Ke Chaha Tha Ye Khayal Na Tha
Ke Dosti Bhi Karega Wo Ajnabi Ki Tarha
Hamein To Pyar Ke Badlay Main Gham Naseeb Hua
Mili Na Hamko Khushi Bhi Kabhi Khushi Ki Tarha
Kabhi Akelay Main Bethon To Gungunaon Tujhay
Ke Aaye Meray Labon Pe Tu Shayari Ki Tarha...!!!

Teray Naam Ki Thi Jo Roshni Usay Khud Hi Toonay Bujha Diya
Na Jala Saki Jisay Dhoop Bhi Usay Chandni Ne Jala Diya
Main Hoon Gardishon Main Ghira Hua Mujhay Ap Apni Khabar Nahi
Wo Shakhs Tha Mera Rehnuma Usay Raston Main Ganwa Diya
Jo Teri Nazar Main Ajeeb Tha Wohi Shakhs Tera Habeeb Tha
Teray Hath Ki Wo Lakeer Tha Usay Hath Se Hi Mita Diya
Mujhay Ishq Hai Ke Junoon Hai Abhi Faisla Nahi Ho Saka
Mera Naam Zeenat-E-Dasht Tha Mujhay Andhiyon Ne Mita Diya
Ye Udasiyon Ka Jamal Hai Ke Hamar Auj-E-Kamaal Hai
Kabhi Zaat Se Bhi Chupa Liya Kabhi Shehr Bhar Ko Bata Diya
Meray Mausamon, Meri Umr Ka Abhi Poora Baagh Khila Na Tha
Wo Jo Phool Thay Teri Chah Ke Isay Zard Rutt Ne Gira Diya...!!!

Raat Sunti Rahi Mai Sunata Raha
Dard Ki Daastan Main Batata Raha
Log Logon Se Chahat Nibhatay Rahay
Ek Wo Tha Mera Dil Jalata Raha
Dhoop Chaanv Si Uski Tabiyat Rahi
Wo Nigahein Milata Churata Raha
Ek Main Hi Pyasa Raha Dosto
Log Peetay Raha Main Pilata Raha
Dil Ke Mehman Khanay Main Ronaq Rahi
Koi Aata Raha Koi Jata Raha
Ham-Maktab Ne Sara Sabaq Parh Liya
Main Tera Naam Likhta, Mitata Raha...!!!

Tera Hijr Mera Naseeb Hai
Tera Gham Hi Meri Hayat Hai
Mujhay Teri Doori Ka Gham Ho Kyun
Tu Kaheen Bhi Ho Meray Sath Hai
Meray Wastay Teray Naam Par
Koi Harf Aye, Nahi Nahi
Mujhay Khauf-E-Duniya Nahi Magar
Meray Ru Ba Ru Teri Zaat Hai
Tera Wal Aey Meri Dilruba
Nahi Meri Kismat To Kya Hua
Meri Mehjabeen Yahi Kam Hai Kya
Teri Hasraton Ka To Saath Hai
Tera Ishq Mujh Pe Hai Meherban
Meray Dil Ko Haasil Hain Do Jahan
Meri Jaan-E-Jaan Isi Baat Par
Meri Jaan Jaye To Baat Hai...!!!

Chalnay Ka Honsla Nahi Rukna Muhaal Kar Diya
Ishq Ke Is Safar Ne To Mujhko Nidhaal Kar Diya
Miltay Hue Dilon Ke Beech Aur Tha Faisla Koi
Usnay Magar Bichartay Waqt Aur Sawaal Kar Diya
Aey Meri Gul Zameen Tujhay Chah Thi Ek Kitaab Ki
Ahl-E-Kitaab Ne Magar Kya Tera Haal Kar Diya
Ab Ke Hawa Ke Saath Hai Daman-E-Yaar Muntazir
Bani-E-Shab Ke Haath Main Rakhna Sambhaal Kar Diya
Mumkina Faislon Main Ek Hijr Ka Faisla Bhi Tha
Hamnay To Ek Baat Ki Usnay Kamaal Kar Diya
Meray Labon Main Muhr Thi Par Meray Sheesha Ru Ne To
Shehr Ke Shehr Ko Mera Waaqif-E-Haal Kar Diya
Chehra-O-Naam Ek Saath Aaj Na Yaad Aa Sakay
Waqt Ne Kis Shabeeh Ko Khwab-O-Khayal Kar Diya
Muddatton Baad Usnay Aaj Mujhsay Koi Gila Kiya
Mansab-E-Dilbari Pe Kya Mujhko Bahaal Kar Diya...!!!

Mujhay Galay Se Laga Lo Bahut Udaas Hoon Main
Gham-E-Jahan Se Chura Lo Bahut Udaas Hoon Main
Ye Intezar Ka Dukh Ab Saha Nahi Jata
Tadap Rahi Hai Mohabbat Ab Raha Nahi Jata
Tum Apnay Paas Bula Lo, Bahut Udaas Hoon Main
Har Ek Saans Main Milnay Ki Pyaas Palti Hai
Sulag Raha Hai Badan Aur Rooh Jalti Hai
Bacha Sako To Bacha Lo, Bahut Udaas Hoon Main
Bhatak Chuka Hoon Main Zindagi Ki Raahon Main
Mujhay Ab Aa Ke Chupa Lo Tum Apni Baahon Main
Mera Sawaal Na Talo, Bahut Udaas Hoon Main...!!!

Tumharay Shehr Ka Mausam Bara Suhana Lagay
Main Ek Shaam Chura Loon Agar Bura Na Lagay
Jo Doobna Ho To Itnay Sukoon Se Dubo
Ke Aas Paas Ki Lehron Ko Bhi Pata Na Lagay
Agar Ho Sakay To Bhool Jao Hamein
Tumhay Bhoolanay Main Shayad Hamay Zamana Lagay
Na Janay Kya Hai Kisi Ki Udaas Ankhon Main
Wo Muh Chupa Kar Bhi Guzray To Bewafa Na Lagay
Hamaray Pyaar Se Jalnay Lagi Hai Ye Duniya
Dua Karo Kisi Dushman Ki Bad Dua Na Lagay...!!!